Burna Boy never still talk anything publicly as the backlash from the sleeping-woman matter continue to follow am everywhere. For more than two weeks now, the Grammy-winning artist never post, react or address the issue for any of him social media pages; Instagram, X or Facebook, even as show cancellations and postponements dey pile up.
The whole wahala start on November 12, 2025, for Red Rocks Amphitheatre, Morrison, Colorado, during one of the stops for him “No Sign of Weakness” US tour. Burna Boy pause his performance midway after he notice say one woman wey dey front row don sleep. For the video wey spread online, e ask the crowd why person go pay money come him show only to sleep. After small talk, he ask security make dem remove her before he continue.
The woman later identify herself as Chaltu Jateny, and she come out explain wetin really happen. According to her, she dey go through serious emotional wahala because she recently lose her daughter’s father. She talk say she just come the show to clear her head and find small joy. For her words, she say she don dey “mentally, physically, and emotionally drained” but still gather strength attend the show because she be longtime Burna fan.
Her explanation touch many people online, and the matter quickly divide social media. Some Nigerians and foreign fans talk say Burna no show compassion at all, say he suppose handle the matter with understanding especially after hearing what she go through. Others defend am, say artiste get right to expect energy from paying fans and say the clip no show the full picture of wetin happen for the venue.
As the online debate dey hot, news begin circulate say some venues and organisers don quietly pull back from hosting Burna Boy for upcoming shows. Some concerts reportedly don get postponed, others removed his name from lineup. Even though official statements never dey clear for most of the cancellations, industry insiders dey point finger at the negative PR from the incident as main reason.
Despite all this, Burna Boy himself never talk anything. For a person wey dey always active online and quick to respond to controversies, the silence surprise many people. Some fans believe say him management dey plan proper response. Others think say he dey wait make the matter die down. But the longer the silence dey, the more people dey ask questions: whether he go apologise, clarify, or just ignore the whole thing.
For now, his official pages still remain completely quiet, no apology, no explanation, no comment. The woman at the centre of the matter also never talk further since her first statement.
With the current tension, many dey watch to see how the situation go affect his upcoming engagements, public image, and the future of the “No Sign of Weakness” tour. Until Burna Boy break silence, the controversy no go calm down anytime soon.
0 Comments