Federal Government and some northern states don order make schools close because kidnapping and insecurity don too escalate for the area.
FG close 41 unity schools, and governors for Kwara, Plateau, Niger, Benue and Katsina don also shut down schools for their states.
Tension rise on Friday as bandits attack St Mary’s School, one Catholic school for Papiri community inside Agwara LGA, Niger State. The criminals carry 215 students and 12 teachers.
This attack happen just four days after 26 schoolgirls bin dey kidnapped for Government Girls Comprehensive Secondary School, Maga, Kebbi.
For that Monday attack, the terrorists shoot the vice principal, Hasan Makuku, kill am straight, and injure the principal. Two of the girls later escape, one come back that same night, another run immediately after the attack.
President Bola Tinubu don direct Minister of State for Defence, Bello Matawalle, make e relocate go Kebbi sharp sharp to coordinate rescue mission.
But before Nigerians fit calm down, gunmen strike again for Niger Catholic school around 2am on Friday.
One person wey dey d school talk say the bandits enter when all boarding students dey sleep. The attack last for almost one hour before dem carry all the victims go bush.
People talk say the terrorists ride come with over 100 motorcycles.
Chairman of Christian Association of Nigeria for Niger State, Most Rev. Bulus Yohanna, confirm say 215 pupils/students and 12 teachers dey among those kidnapped.
E say many students wey escape don begin go house as the school don shutdown completely.
The Niger State Police Command confirm the attack and talk say police and soldiers don enter Papiri to rescue the victims. The police spokesperson, Wasiu Abiodun, say dem never still know the exact number of students kidnapped because investigation still dey go on.
He also talk say the school go collect punishment because dem open against government order to close schools for that area.
Federal Government and States Close Schools
Investigation from Saturday show say many northern communities don suspend school activities because insecurity don too much.
FG come order say make 41 unity schools close oh, after cases of abduction begin increase everywhere.
The circular come from Binta Abdulkadir, Director of Senior Secondary Education.
Niger State Government also close all boarding schools for Niger North.
Kwara State GGovernment close down schools for four LGAs, Isin, Irepodun, Ifelodun and Ekiti, because of insecurity.
Plateau State close all basic schools.
Katsina State close all public schools after bandits begin disturb many communities.
Benue NUT chairman, Akuma Terna, talk say almost 50 public schools don shutdown, many for over two years, and the students dey IDP camps.
Sokoto and Kebbi State don tighten their Security
Sokoto and Kebbi governments don increase security for schools ahead of exams.
Kebbi Governor’s spokesperson, Ahmed Idris, talk say security operatives don dey on alert and nothing go disrupt learning.
Over 42,000 Schools for Naija dey Exposed
National Safe Schools Plan show say over 42,000 schools for northern Nigeria no get fence, making them easy targets.
4,270 secondary schools for 21 northern sstates even for the country capital, FCT no get perimeter protection at all.
For primary schools, the matter worse, 38,684 primary schools no get fence.
Defence Minister Matawalle Relocates to Kebbi
Matawalle don land Kebbi and meet with security chiefs to push aggressive rescue operation.
Officials talk say Abuja orders clear: bring back the girls safely.
Northern Governors React
Northern Governors’ Forum condemn the Niger kidnapping, call am unacceptable.
Dem talk say schools must be safe and learning environment must no turn to fear zone.
Dem dey beg for stronger intelligence gathering and community vigilance.
Niger Govt Blames School
This one even dey funny, after mata don cast na em Niger State Government say the Catholic school disobey the directive to close schools for the zone even after security alerts.
Families of the kidnapped Kebbi girls don dey hold prayer sessions since the attack.
Parents talk say the pain don too much, one father say e wife blood pressure don rise from stress.
Another man talk say both hin daughter and granddaughter dey among kidnapped children.
Kebbi Governor dey Vex Say them Withdrawal Soldiers
Kebbi Governor, Nasir Idris, accuse military of withdrawing troops 45 minutes before the attack, despite government warnings. E come be as if dem plan am oh, the whole thing dey suspicious, so e come call for full military investigation.
Meanwhile, Northern CAN Chairman, Rev John Hayab, say many of these attacks no be about ransom but pure bloodshed.
E ask why bandits dey target poor people instead of rich ones if na money dem want.
Archbishop Adewale Martins beg government to restore citizens’ confidence.
E say if terrorists fit kill Army General boldly, ordinary citizens no safe at all.
Hope say you dey enjoy our content, make you no forget to subscribe oh, so that you go be among the first people to know when we make any post.
You fit also checkout some related contents sha, you fit like am.
0 Comments